Rev 8 | MCQ | STEP | Vea ka'ene aja túchamaa iropu no'o ijí Hu rasamajaho ira no'a maho'o pa'arena na'eme vea oma kwinu paranana.

Revelation of John 8

Aja Iropu No'oji Rasa'eme Ona'oji'ina Tauja Iropu No'o 'Ekara

1 Vea ka'ene aja túchamaa iropu no'o ijí Hu rasamajaho ira no'a maho'o pa'arena na'eme vea oma kwinu paranana. 2 Na ki'eme 'ona oji'ina iropu no'o Godoni una'i namijajaho tauja iropu no'o vajihana. 3 'E'eme 'ona oji'ina pina roe swasa vejuri tini korutia tevua 'unanama naminana. Uneka ka'ene jae amua mamaa 'uhunijaho niho'o mapoka mapoka vajahana. 'Ejakame hura ijí 'eke Godoni ehiji jihipuni siporua ka'ene toronu huni una'i koruti 'aiju ka'ene swasa vejuri 'ahi navuji ahuma irecha'amarono vajahana. 4 'E'eme inisenisia huni u'a 'ee Godoni eijihipuni siporuji'i ahuma 'ona oji'ina huni ija tahi ajima Godoni una'i va'ana. 5 'E'eme 'ona oji'ini tevua apene swasa vejuri 'ahi vena 'eke vaji irechavume itu'o'unana. 'Ejumakavi'i hu apene mwei pi'onavume ni'aha kwinu akúpi 'anú'eme vea ni'ima'ura pi'ime ira ani ani re'eme mwevarivura ni'ima'uri roana.

Tauja Hwasihara

6 'E'eme 'ona oji'ina iropu no'o tauja iropu no'o 'ekajija hwasi'iro amairiaravara. 7 Tauja amurijara 'umenajino muna vena 'aiji'i ahuvajaho mwei pi'onavara. 'Ejume mwea pwinana'a rena paranana. 'Ene icha 'ee ija pwinana'a rene paranana. 8 'E'eme 'ona oji'ina amurijihuni rorijara tauja hwasi'eme unenu pina huri'a ni'ima'ura sa'ina veni reji'inijaho apene sohi vaji pi'onavara. 'Ejumakame soha pwinana'a 'aa renana. 9 'Ejumakame ijí soha vaji uneunecha ka'ene mai'o hiji'inijija pwinana'a kwamasahume sisima pwinana'a siserasahara. 10 Ona'oji'ina no'opisu ijara tauja hwasi'eme akúpi 'ahi china niho'o ni'ima'ura tajahe'une naheha puna'i re'eme toa 'ee toúja pwinana'a 'ahi 'onana. 11 China kajihuni ihijaho Umupavi'ina. 'Ena'omo toa Umupavi'ina rejumakame ea mapoka toa kaji ine tirahara. Ijihuni maijaho toa umupavi'ina. 12 Ona'oji'ini no'ona no'onijara tauja hwasi'eme vea masapa 'ee china pwinana'a vejume nutumana. Ijihuni hahi vea hamia parenana 'ee masapa hamia pahananana. 13 'E'eme na 'a'ama niri'i kavume akúpa 'aha kahino púrúha ni'ima'urijaho emoji'i ira ajira ika'ina 'umenana. Joni eha sisea namu! Joni eha sisea namu! Joni eha sisea namu! Ea mapoka ka'ene ja mwe'i hiju jihija eha sisea apehuna. Ijihuni maijaho 'ona oji'ina no'opisu tauja hwasi'avaji ja 'eka mapoka ka'ene mwe'akaki hijujija sisea ni'ima'ura joni haha 'ahi re'ena 'umenana.